Við fylgjumst með heilsu og þroska

Frá fæðingu til skólaaldurs

Ung- og smábarnavernd stendur öllum foreldrum til boða þeim að kostnaðarlausu.

Foreldrum nýfæddra barna er boðið upp á heimavitjanir fyrstu vikurnar og koma síðan í kjölfarið á heilsugæslustöðina með barnið í skoðanir. 

Í heimavitjunum skoðar hjúkrunarfræðingur barnið, metur þroska þess, þyngd og höfuðummál. Foreldrar fá ráðgjöf og fræðslu varðandi umönnun barnsins og eigin líðan.

Þegar barnið er sex vikna gamalt er læknisskoðun á heilsugæslustöð og við þriggja mánaða aldur hefjast bólusetningar.

Nánari upplýsingar um fyrirkomulag ung- og smábarnaverndar færð þú á þinni heilsugæslustöð.

Stuðningur við fjölskylduna

Markmið ung- og smábarnaverndar er að efla heilsu, vellíðan og þroska ungra barna með reglulegum heilsufarsskoðunum ásamt stuðningi og heilbrigðisfræðslu til fjölskyldna þeirra. Áhersla er lögð á stuðning við fjölskylduna. Fylgst er með þroska barna frá fæðingu til skólaaldurs.

Hjúkrunarfræðingar og læknar á heilsugæslustöðvum sjá um ung- og smábarnavernd. 
Foreldrum er ávallt velkomið að hafa samband við hjúkrunarfræðinga í ung- og smábarnavernd á milli skipulagðra skoðana.

Skoðanir og bólusetningar

Hér má sjá yfirlit yfir skoðanir og bólusetningar í ung- og smábarnavernd eftir mismunandi aldri:

 Aldur

Hver skoðar 

Hvað er gert

<6 viknaHjúkrunarfræðingur Heimavitjanir
 6 vikna Hjúkrunarfr. og læknirSkoðun, þroskamat og bólusetning gegn rótaveiru með munndropum
 9 viknaHjúkrunarfræðingur
Heimavitjun eða skoðun á heilsugæslustöð
 3 mánaðaHjúkrunarfr. og læknirSkoðun, þroskamat og bólusetning gegn rótaveiru með munndropum, kíghósta, barnaveiki, stífkrampa, haemofilus influenzae sjúkdómi gerð b (Hib) og mænusótt í einni sprautu, pneumókokkum í annarri sprautu
 5 mánaða HjúkrunarfræðingurSkoðun og bólusetning gegn rótaveiru með munndropum, kíghósta, barnaveiki, stífkrampa, haemofilus influenzae sjúkdómi gerð b (Hib) og mænusótt í einni sprautu, pneumókokkum í annarri sprautu
 6 mánaða HjúkrunarfræðingurSkoðun, þroskamat
 8 mánaðaHjúkrunarfræðingurSkoðun
 10 mánaðaHjúkrunarfr. og læknirSkoðun og þroskamat
 12 mánaðaHjúkrunarfræðingurSkoðun, þroskamat og bólusetning gegn kíghósta, barnaveiki, stífkrampa, haemofilus influenzae sjúkdómi gerð b (Hib) og mænusótt í einni sprautu, pneumókokkum í annarri sprautu og meningókokkum í þriðju sprautu 
 18 mánaðaHjúkrunarfr. og læknirSkoðun, þroskamat og bólusetning gegn mislingum, hettusótt, rauðum hundum  og hlaupabólu í einni sprautu
  2 1/2 ársHjúkrunarfræðingurSkoðun, þroskamat og bólusetning gegn hlaupabólu
  4 áraHjúkrunarfræðingurSkoðun, sjónpróf og bólusetning gegn kíghósta, barnaveiki og stífkrampa í einni sprautu

 

Ung- og smábarnavernd fyrirbura

Heilsugæslustöðvar sinna ung- og smábarnavernd fyrirbura sem fædd eru fyrir 32 vikna meðgöngu og/eða með fæðingarþyngd undir 1500 grömm.  

Hjúkrunarfræðingur fyrirbura fer í heimsókn til fjölskyldunnar á Vökudeild Barnaspítala Hringsins og fer í heimavitjun fljótlega eftir útskrift. Fjöldi heimavitjana fer eftir þörfum. Foreldrar eru beðnir um að hafa samband við sína heilsugæslustöð við útskrift barnsins frá Vökudeildinni til að ákveða fyrstu heimavitjun. Í heimavitjunum er fylgst með vexti og þroska barna, foreldrum veittar ráðleggingar og stuðningur.

Fyrsta heimsókn á heilsugæslustöð fer eftir aldri barnsins eftir útskrift og hvenær barnið er í eftirliti hjá nýburalæknum Vökudeildar. Við þriggja mánaða aldur hefjast bólusetningar. Frá þeim tíma kemur barnið reglulega í skoðun og bólusetningar. Gert er ráð fyrir að sum börn þurfi fleiri heimsóknir en önnur. Fylgst verður sérstaklega með vexti, þroska og hegðun barnanna. Skoðanir og bólusetningar eru einstaklingsmiðaðar. Foreldrum er ávallt velkomið að hafa samband við heilsugæslustöðina umfram þessar skipulögðu skoðanir.