Ákveðið hefur verið að gera breytingar á sýnatökum vegna Covid-19 frá og með næstu mánaðarmótum. Frá föstudeginum 1. apríl mun Heilsugæsla höfuðborgarsvæðisins eingöngu bjóða upp á PCR-sýnatökur á Suðurlandsbraut 34 en hægt verður að bóka hraðpróf vegna ferðalaga hjá einkaaðilum.
Einkennasýnatökur
Þeir sem eru með einkenni sem benda til þess að viðkomandi sé með Covid-19 geta bókað sýnatöku á mínum síðum á vefnum Heilsuvera. Hægt er að leita sér aðstoðar við að bóka einkennasýnatöku á netspjalli Heilsuveru. Ekki þarf að greiða fyrir þessa þjónustu.
Sjúklingar með Covid-19 sýna oft eitt eða fleiri af einkennunum hér að neðan:
- Hálsbólga
- Hósti
- Kuldahrollur
- Hiti
- Óþægindi frá meltingarvegi, uppköst eða niðurgangur
- Kvef, nefrennsli eða stíflað nef
- Bein- og vöðvaverkir
- Þreyta og slappleiki
- Bragð- og lyktarskyn hverfur
- Erfiðleikar við öndun
- Höfuðverkur
Ferðalög
Þeir sem þurfa að fara í PCR-sýnatöku vegna ferðalaga geta bókað sýnatökuna á vefnum travel.covid.is. Sýnatakan og vottorðið kosta 7.000 krónur.
Ekki verður boðið upp á hraðpróf hjá Heilsugæslu höfuðborgarsvæðisins. Þeir sem þurfa að fara í hraðpróf vegna ferðalaga geta bókað sýnatöku á hradprof.is eða testcovid.is en sú þjónusta er ekki á vegum heilsugæslunnar.