Geðheilsuteymi ADHD fullorðinna veitir annars stigs þjónustu fyrir einstaklinga 18 ára og eldri.

Sérhæfing teymisins er greining og meðferð á taugaþroskaröskuninni athyglisbresti/ofvirkni (ADHD). Geðheilsuteymið starfar á landsvísu með áherslu á þverfaglega samvinnu starfsmanna teymisins og samstarfsaðila á öðrum stigum heilbrigðisþjónustu.

Geðheilsuteymi ADHD fullorðinna veitir heildrænt mat vegna einkenna ADHD. 

Hlutverk teymisins er að meta einkenni ADHD yfir æviskeiðið til  að kortleggja áskoranir og hamlanir. Geðheilsuteymi ADHD fullorðinna hefur að leiðarljósi að skoða alla þætti sem hafa áhrif á andlega heilsu. Markmið teymisins er að veita rétta greiningu og meðferð með sérhæfðri þekkingu, heildrænu mati á ADHD og hag skjólstæðingsins fyrir brjósti. Öll þjónusta teymisins er notendamiðuð og lögð er áhersla á samþætta nálgun. 

Geðheilsuteymi ADHD fullorðinna styðst við gagnreyndar aðferðir og leiðbeiningar við greiningu og meðferð vegna ADHD. Teymið vinnur eftir vinnulagi Embættis landlæknis þar sem fagleg gæði og gott viðmót eru höfð að leiðarljósi. Lögð er áhersla á að skjólstæðingum sé vísað í það úrræði sem þörf er á að hverju sinni út frá klínísku mati teymisins.

Ferlið til að óska eftir þjónustu teymisins hefst með því að bóka tíma hjá þinni heilsugæslu og skila inn nauðsynlegum fylgigögnum. Fylgigögn varðandi frumgreiningu má finna hér til hliðar.

Hafir þú verið með ADHD greiningu í bernsku, og þarfnast nú endurmats, þarf að skila inn greiningarskýrslum varðandi fyrri greiningu séu þær ekki til staðar í sjúkraskrá.

Hafir þú hlotið greiningu og lyfjameðferð á fullorðinsárum en lyfjaskírteini er ógilt og þarfnast endurmats, þarf læknabréf frá fyrri meðferðaraðila og/eða gögn til staðfestingar svo hægt sé að meta áframhald innan ADHD teymisins.

Tekið er við tilvísunum frá heimilis- og heilsugæslulæknum.

Þau sem flytja til Íslands með ADHD greiningu og lyfjameðferð þurfa mat sérfræðilæknis svo hægt sé að sækja um lyfjaskírteini og veita áframhaldandi lyfjameðferð á Íslandi. Gerðar eru eftirfarandi kröfur varðandi fylgigögnin sem þurfa að berast teyminu:

• Læknabréf eða greiningargögn sem staðfesta greiningu á norðurlandatungumáli, ensku eða þýdd yfir á íslensku af löggildum þýðanda.
  
• Lyfjasaga og núverandi lyf frá meðferðaraðila á norðurlandatungumáli, ensku eða þýdd yfir á íslensku af löggildum þýðanda. 
• Upplýst samþykkisblað fyrir þjónustu teymisins. 

Gerð er krafa um að greiningin samræmist hefðbundnu greiningarferli, að gögn sýni að viðkomandi sé á viðeigandi lyfjum í réttum skammti og að lyfjameðferð sé orðin gagnreynd og stöðug. Geðheilsuteymi ADHD fullorðinna áskilur sér rétt til að hafa samband við greiningar- og/eða meðferðaraðila sem undirritaði gögnin sem skilað er inn og/eða vísa frá beiðnum sem uppfylla ekki kröfur.

 Teymið tekur ekki við og vísar frá beiðnum varðandi:

• Áframhaldandi meðferð fyrir fólk búsett á Íslandi sem hefur á ferðalagi erlendis, fengið greiningu og einstaka lyfseðla.
  
• Einstaklinga sem hlotið hafa greiningu en ekki fengið neina lyfjameðferð.
  
• Einstaklinga sem eru ekki útskrifaðir frá sínum meðferðaraðila og eru enn í aðlögun á lyfjaskammti. 

Þessir einstaklingar þurfa beiðni eftir greiningarferli hjá ADHD teymi.

Læknar vísa rafrænt í þjónustuna ef önnur úrræði hafa ekki gefið bót á einkennum, fyrir liggur jákvæð niðurstaða úr skimunarferli og tilvísandi læknir metur sem svo að að þörf sé á aðkomu Geðheilsuteymis ADHD fullorðinna. Tegund tilvísana fer eftir starfsstöð tilvísanda.

• Heilsugæslur á höfuðborgarsvæðinu nota: Beiðni um meðferð, velja viðeigandi deild og fylla út flýtitexta.
• Heilsugæslur á landsbyggðinni nota: Tilvísun, velja viðeigandi deild og fylla út flýtitexta.

Hafi læknir ekki aðgang að rafrænni tilvísun í SÖGU kerfinu má finna leiðbeiningar í beiðnapakka Geðheilsuteymis ADHD fullorðinna.

Mikilvægt er að tilvísun noti nýjustu flýtitexta og gögn og sé vel útfyllt svo hægt sé að taka afstöðu til hennar. Flýtitextinn minnir á hvað þarf að koma fram. Aðeins er tekið við tilvísunum og gögnum á rafrænu formi. Ófullnægjandi tilvísun verður endursend.

Frekari upplýsingar má finna í beiðnapakka Geðheilsuteymis ADHD fullorðinna, meðal annars vegna forgangsóska. Beiðnapakkinn var uppfærður í febrúar 2024 og var sendur á allar heilsugæslustöðvar á landsvísu. Starfsmenn HH geta fundið beiðnapakkann í þekkingarbrunni HH. Uppfærðan beiðnapakka skal nota í öllum tilvísunum. Sé beiðnapakkinn ekki til staðar á þinni starfsstöð má hafa samband við teymið til að fá hann sendan.

Öll fylgigögn þurfa að berast rafrænt samhliða tilvísun þegar vísað er til teymisins. Niðurstöður skimunar þurfa að vera til staðar, líkt og þær koma fram í reiknivélinni. 

Hægt er að setja reiknivél hegðunarmatskvarða í heild sem viðhengi í SÖGU kerfinu eða í viðhengisdálk á tilvísunareyðublaði. Einnig er hægt að afrita viðeigandi niðurstöðudálka úr skjalinu og setja beint inn í beiðnartextann. 

Teymið vinnur fljótlega úr beiðnum sem berast. Ófullnægjandi beiðnum þar sem fylgigögn, flýtitexta eða niðurstöður vantar er vísað frá. Ef þörf er á aðstoð vegna beiðna má hafa samband við teymið.

Við útskrift er bréf sent á tilvísandi aðila til að gera grein fyrir niðurstöðu mála hjá viðkomandi skjólstæðingi.

Þegar skjólstæðingur greinist með ADHD og þiggur lyfjameðferð, tekur tilvísandi læknir yfir lyfjameðferð við útskrift úr teymi. Upplýsingar varðandi gang í lyfjameðferð og skammtastillingu má finna í læknabréfi sem almennt er sent fljótlega við útskrift.

Útskrifaðir skjólstæðingar geta ekki bókað tíma hjá geðlækni teymisins, en læknar geta bókað eftir þörfum símaráðgjöf hjá geðlækni teymisins. 

Þjónustan byggir á sérþekkingu starfstétta, þverfaglegri samvinnu starfsmanna teymisins og samstarfsaðilum á öðrum stigum heilbrigðisþjónustu.
 

Í teyminu starfa geðlæknir, hjúkrunarfræðingar, sálfræðingar og skrifstofustjóri. Samsetning fagstétta hverju sinni getur verið mismunandi.